مهادن الزعيم

¶ (اعلاميا) ... الموكب حقق نجاح كبير واكيد الناس الشافو الموكب الليلة في السوق العربي قرابة المليون ودا اعلان مباشر واكيد ح يعكسوا لاهلهم في الحلة وكدا وصلنا لرقم كبير من الناس وعرفوا انو الثورة لسة شغاااالة بذات الروح ...
¶ (ميدانيا) ... موكب اليوم اختصر المسافة بصورة كبيرة وبدأ من داخل الصندوق (يعني الزمن الكان بوصلنا من باشدار لشروني الليلة وصلنا لحدي برج البركة) دا غير انو اختصر على ناس كتار حق المواصلات لانو اغلبنا بتقاطع بالسوق العربي او جامعتو قريبة من العربي واكيد في ناس جو هتفوا معانا ولحقوا اشغالهم ...
¶ (تعبويا) ... موكب اليوم دحض كافة الاشاعات البطلعوها الانقلابيين عننا (شفع مخاريش وجايين للاشتباك وبكسرو وبسرقوا) اها الليلة شافونا بعيونهم ونحن بنشبك ايدينا عشان نأمن مسار الموكب بعيدا عن ارتكازات القوات الامنية وشافونا ونحن بنمر بين العربات بدون م نقفل شارع وشافونا ونحن ماشين جمب الفريشة عادي بظون م زول فينا يدنقر يشيل حاجة زول وشافوا القوات الامنية وهي بتضرب فينا بمبان وصوتي ....
¶ شافونا ونحن بنهتف سلمية سلمية وسمعونا ونحن بنقول صحة وتعليم مجان والشعب يعيش في أمان وسمعونا ونحن بنردد نشيد العلم في نص السوق وشافو في وشوشنا طلبة جامعات وعمال وموظفين ....
¶ اكتر حاجة عجبتني تحييد المدرعات بصورة كبيرة والمواطنين شافو القوات الامنية وهي بتفحط بالتاتشرات في الشارع وسط الناس وشافو البمبان البتجدع ساي وسط الناس دون مراعاة لاعمارهم وحالاتهم الصحية وشافو القوات الامنية وهي بتقفل شارع الجمهورية جمب القنصلية المصرية وبعض الشوارع الفرعية بالقرب من العصر ...
¶ شافو المدرعات بتاعت الموية وهي مغطاة بالسلك الشائك وشافو مدرعات البمبان والكمية البتفكها في الثوار وسرعة الجنونية ورددوا سرا وعلانية (الله ينصركم ياثوار) .....
¶ موكب اليوم هزم الآلة الاعلامية لدى الانقلابيين الحاولت تشويه صورة الثوار منذ الانقلاب وصورتنا على اننا تشكيلات عسكرية لكن الليلة الموطنين شافو اولادهم وبناتهم بهتفوا بكل السلمية للمطالبة بحق الجميع في حياة كريمة( خصوصا انو دا يعتبر تاني موكب يتم الاعلان عنو داخل السوق العربي ويتنفذ ... الاول كان موكب 30 نوفمبر 2021) فياريت نواصل على ذات النهج لانو هتاف ساعة داخل السوق العربي اقوى واكبر فعالية من اشتباك ساعات في شوارع جانبية ....
¶موكب اليوم دخل المواطن في نص الحالة الثورية بعدما كان مجرد جمهور متفرج على صراع ثنائي بين طرفين اي واحد فيهم واقف في اتجاه واصبح المواطن الجاء هو ذاتو موكب ....

سلام و محبة