ود قيافة..
مرثية شهيد جبرة والصحافة الشهيد عيسى عمر
شعر: حسن بكري
#الهدفثقافةوفنون
ود قيافة
شبلي شال هم شعب كامل
بينو بين الخوف مسافة
عيسى صادق
عيسى صادح
عيسى عافر شان يضع حد للخرافة
ونادى حيا

فى رقاب الحق تمائم
زول بطل والمسرحية
شلة بِتكتِل صغارنا
بتكسر ألحان القوافي
وتجبِر إيد البندقية

وكان خلافة
أدى فرض الآدمية
وقالها لازم
إنو تحيا عشان رسالة
وقام يغرد
حلقت فى الروح حمائم
وإنكسر خاطر مدينة
وعيسى مصلوب فى الصحافة
ضلمت والدنيا غيمة
ونجمه ضاوي
عيسى فى جبرة الحكاوي
ضحكتها وريحة ترابا
فى الترس برجاك يلاوي
نسمة بين رفقه وصحابه
روح تلوح شايلة راية
بسمة مابين المتاريس مارقة دابا
صوته محمود نبضه دافي
ماشي حافي
ولابس الأوجاع حكاية
شبلي حالم
فى وطن رأسمال عيالك طلقة طاشة
بوكس مُسرع
بعدو حيرة
كاكي برقيت بي ترابي
ومُرتسم فى ناحية طيرة
والطرف تالت بوزع للوليدات في الذخيرة
بوكس مُسرع
زي كأنوا ولا دهس من لحظة ضحكة
فات ولا عاين وراهو
طلقة مرقت
شيعت ود فى صباهو
وحلقت روحه بترفرف
رفة العين الشمال
اتقبض قلب أمو لكن
اتنفض فى روحها فال
نادى فى الخاطر منادي
ذكرهم بي الله قال
إنو لاخوفاً عليهم
وإنو مهما الظلم طال
بكرة شمس الحق هتشرق
ويحصل البتشاف محال
والله قادر..