قالولنا العنف المفرط
جابوهو المتظاهرين ..
قالولنا هديك حُـجَّارُهم
ودروعهم للتأمين ..
قالوا الهجمات ازدادت
قالوا القوات اتصابت
وكانه الناس ماعارفة
وكاننا ماشايفين !!!

لا اول وجعة ودمعة
لاتاني شهيد في الدار ..
تسترخص روح بشرية
وتقول حرقوا الدفار؟! ..
حافظين اعذارك كلها
تبريرك ضرب النار ..

لا حاجة جديدة علينا
لا كانت اول جولة ..
ما المجرم مازول واحد
قدامه جهاز الدولة ..
البصنع بيئة بتسمح
لشرطي يصوب طلقة ..
فصدور السلميين ..
لجندي يعمر دوشكا
في ارض المدنيين ..
لدعم سريع قتَّلنا
وغدر بالمعتصمين ..

الدم مابيسقط ابدا
حيظل ليوم الدين ..
وشهيد الليلة حناخد
بحقو من العادين ..
من أصغر زولا فيهم
لأكبر قائد وآمر ..
وبلدنا خلاص انعتقت
مابتقبل تاني عساكر ..
ما بتقبل فرض السلطة
ومابتاخد تاني اوامر ..

رافضكم كل الشارع
والبلد اقليم اقليم ..
وهتافه العالي حيوصل
لكل ضلالي لئيم ..
حنهد بنيان القتلة
نبنيو صحة وتعليم ..
نفديهو دمانا السالت
باسم الناس الماتت
باسمك ابراهيم ..