الطيب عبد الماجد
في ذات يوم ..
في بداية الثورة دي والدنيا مولعة مشيت ناس ( عوض ) جيرانا ديل قالو في واحد جاي يتقدم لي بتهم الفي النص دي إسمها ( مروة ) ....!!
فدعونا نحن الجيران القراب نجي نحضر معاهم ... !!
دخلنا المغربية كدا مع الأذان المهم. صلينا معاهم وقاعدين منتظرين العريس الجاي دا ...!!
قالو إسمو ( حاتم ) ...( حاتم الرفاعي ) .....من أولاد ( بانت ) ديل ... وإنهم جاييين بعد المغرب طوالي .....!!
أها ( المغرب ) إنتهى وحاتم ما جا ...!!
لحدي سبعة ونص كدا برضو ما جا ....!!
قالو ما بتخففوا يتصلو تلفونات ساكت الدنيا
قبايل (خطوبة ) .......!!
( وكت ) جات ( تمنية ) ...بدينا نتململ ....!!
تمنية ونص بدت الطنطنة .....!!
المهم لمن جات الساعة تسعة تسعة ودقداق كدا التلفونات دي بدت تتطاقش وكلها مغلقة ....والجو إتكهرب ...وسرت همهمة بين الحضور إنو العريس الدسيس دا كبرا بالباب الورا ...
ووش الإحراج ( المكرفس ) داك بدا في الظهور ...
وعبارات المواساة ...نوع ( الغايب عذرو معا ) ...!!!
وليي خير .....!! وكل تأخيرة فيها خيرا ...رقدت رز ...!!
والعروس جوه حالتا تحنن ....!!
وناس ( أميرة فلقصة ) خلاص استعدلن للشمار ات ...!! وبدن يجهزن البهارات ...!!! استعداد للبث المباشر ....!!
( أميرة دي أول ما تتمشي بالتلفون وهي بتتكلم وتغتيهو بيدها الشمال ....فاعلم أن الأمر جلل ...!!
وعمك ( عوض ) دا خلاااص دخل في حال تاني ....!! بقي يخش ويمرق ... !!
المهم وكت جات الساعة تسعة ونص بالظبط نسمع ليك جوطة شديدة قدام البيت ...!! مرقنا نشوف الحاصل ...نلقي ليك كمية من البشر ماليه الشارع دا مستفنو لي عينو ...شايلين ليهم زول رافعنو فووووق ..!!
طلع دا ( حاتم ) الود زاتو القالو جاي يخطب ( مروة ) دي ....!!
رافعنو ليك في السما والقميص دا مشروط بالجنبه ....والهتافات مدورة ....
( اللليلة ما ( بنقد ) ( بكسر القاف) ...!! إلا العريس ( يعقد ) ....
والجماعة بي ورا مدورين .....( ثورة ) ...
وجنس لمة هي ...!! خشم الباب دا إتملا فل
والعريس دا اليدين ديل فوق ....!! ويهتف ...والقيامة قايمة ....!!
قالو القصة إنو ( حاتم ) دا وهو جاي علي ناس ( عوض ) ديل لاقتو مظاهرة في ( الأربعين ) ماشه علي ( العرضة ) ....! إنقشط فيها طوالي ونسي ليك أي حاجه ...!!
( شايل علمو في جيبو )
أها العساكر حاوطوهم في زقاق كدا ....ردموهم ( بمبان ) ....ردم الجن .....!! و ( الدفار ) دور حديدو ....
دخلو ليهم بيت ناس كدا ساكت لحدي ما الأمور تهدا ....وتاني يجو كارين ...!!!
( رجوع ماف ...!! قدام بس ورا إعدام ) .. !!
أها البيت الدخلو فيهو دا بقى بيت ( صبحية ) بس جابو ليهم قدر الأكل الفي كلو والموية والقهوة ..وفتحو الأوض للبنات ...وفرشو باقي البيت ...والجيران برضو رفعو أكل بالحيطة .....ملحمة شعبية ...واقفين ألف أحمر ...
شوف السودان دا حلو كيف ..!!
هسا بالله ديل ناس بحاصروهم .....
يمين دا شعب ( يتبروز بس )
والبيت بي بره محاصر التقول ( غزة ) ...ومافي طريقة مخارجه ......!! ( كتمة ) جد .....!!
لحدي ما جات القوات الجويه ......( المعلمين الكبار )
( ديل الثورجية البطلعو ريسين البيوت ديل ...!!
...( القوات الخاصة )
( أولاد زي المطرة ياخ )
أها ( الكوماندوز ) ديل فكو الحصار عن أخوانهم في الأرض ....ومن ضمنهم ( حاتم ) العريس دا
أها ( حاتم ) لما حكي للثوار قصتو دي ..!! أصرت كل هذه الجموع إنها تصل معاهو ...وتعزو في اليوم دا ....!!
( ودا اليوم الدايرنو ليك ياحاتم ...!! )
وهاهم قد وصلو الان علي مشارف البيت .....!!
( حلويييين ياخ ....شباب زي الليل
المهم الموقف كان بهز أي زول ....!! طلعنا نحن من جوه بقينا نهتف معاهم والحلة كلها دورت .....!!
( حرية سلام وعدالة... والثورة خيار الشعب
ود أخو عوض الصغير دا إسمو ( رماح ) طوالي ولع ليه لستك
والزغاريد طقت ....!!
في واحد قال أها يا خوانا بعد دا طوالي حقو نتحرك علي الكبري
عمك ( عوض ) قال ليه يازول قول بسم الله ....!!
كبري شنو كمان زي الوكت دا ....الساعة عشرة ياخ ...!!
( الجدول ) ذاتو ما قال كدا ....
حليييل أرض ( الجداااول ) و ( المواكب ) و ( الزنازين ) (الترن )
الليلة ما عاد المراكب شرقن
والقمري فوق نخل الفريق فاقد الأهل
يبكي ويحن ...
ياحليلو عمك (عوض ) دي ما بتو كمان .....!! عايز يفرح بيها الله يسعدك ويسعدا ياعم عوض ...!!
المهم الجماعة قعدو يضحكوا في عز المظاهرة الليلية دي وإتذكرو فعلا إنو ( حاتم ) عريس ...!!
( عوض ) عاين لي شيخ ( الطاهر ) كداااا...
( شيخ الطاهر ) دا الإمام بتاع جامع حلتنا ) ....!!
وعمك تاني كبير كدا ماعارف إسمو منو طلع دا عم ( حاتم ) الكاتما دا ..( حاتم أبوهو متوفي ....) ..!!!
الله يرحمو .....
أها التلاتة عاينو لي بعض .....!!
وقالوا نعقد .....!!
قولة نعقد دي أنا قلتا سقطت ....!!!
بازوووول كواريك الجن ...
وبالفعل تم عقد قران
( حاتم الرفاعي ) علي ( مروة عوض الجيد ) ❤
في ذلك اليوم المجيد ....
وشقت زغرودة سماء المدينة المحتشدة ...!! تلتها أخريات ...!!
جارنا ( مصطفي ) دا فكا ليهو كم طلقة كدا في الهوا إبتهاجا بعقد القران ....!!
طوالي في نفس اللحظة طلعت تلاته ( جرادل ) مضادة
( للبمبان ) وسبعة لبسوا الكمامات وارتكزوا ....!!
وكنداكتين عملو ساتر ......!!
هييييع ( أنا أخو الراكزات )
قايلنها ( هجمة مرتدة ) طلعت ( نيران صديقة ) ...
( ثورة زي الثورة ياخ )
وتاني شالو العريس لافين بيهو .....
( مروة ) تتبسم ساااكت بي جوه ...البنات يباركن ليها شابكاهم ليك ...تسقط بس ...!!
( قبل شوية هي ذاتا كانت ساقطة المجرمة ....)
( أمونة ) قالت ليها ...
( حرية سلام وعدالة ....( حتومة ) حبيب القلب ) ...!!
والبنات فقعوها ليك ضحكة بما فيهم العروس ....!!
وكانت نقطة ضوء وبارقة أمل في تلكم الأيام العصيبة وسماء الخرطوم محتقنه بالعتمة والدخان ومزاجها متعكر .....!! غير أن لدي الجميع قناعة راسخة وإحساس عميق بأنه سيأتي يوم ما ستعقد فيه قرانها علي الحرية كما حدث لحاتم ومروة اليوم .....!!
يرونه بعيدا ونراه قريب ...!! يرونها عصية ...ونراها دانية أبيه ....!!
وغني ياخرطوم وغني ..شدي أوتار المغني
مبروك للعروسين بيت مال و.........( جمال ) ....