يا ستو ما شفتي الحصل
لما إرتحلتي إلى عُلاكْ
الواطا إلتزمت وعودا
وضمّٓدت جُرح الشوارع بي خُطاكْ
وسمانا واستنا و مشتْ
مبهورة تهتُف بي هُتافِك من هِناكْ
وسمعنا بي كل الوضوح
صوتِكْ بِردِّدْ ( يا وطن أنا في حِماكْ )
والنيل بيتلّٓفتْ يعايِّن في شروقِك مُبتسم
مُستغرِب العزم الجواكْ
و أنا والرفاق جاهرانا أنوار الصمود
وهتفنا قُلنالِك كفاكْ
ما عادت الآمال بعيدة
ولا الوطن بِحْمٓل بلاكْ
خليك حضور كُلْ ما التروس إتطاولتْ
وإتهافتتْ و إتنافستْ تطلب رضاكْ
خليك حضور لما الوطن يديك وسام
ووصية للشُهدا المعاكْ
فحواها إنو الثورة محبوبة الشباب
ما بتنهزِم ...
والنصر قاعِد مُنتظرنا وياهو داكْ
*****
للنجمة :
النحبِّك ..
قالت :
الغيم .. عاد يلبِّك
وانت بتخاف الرعد
قلت لى دار ابقى جنبِك
لامن العسكر يفوتوا
قُت لها :
الناس عاد يموتوا
قالت :
الموت هو البطمن
والمطر بطفى الرتينة
******