وكان بغني.. للمساكين.. والمسولتين.. والحفات
وكان بغني للمنافي والعصافير والرعات
وكان بغني لي بلد.. في الحلم جاي اغنيات
وكان بطمبر وكان بدوبي للحياة
تاني قام واحد ملك.. رووح.. وفات
وكان ملك في الريدة وانسان في الصفات
وكان مهاجرفي دموع كل البكات
وكان وتر مشدود ومسكون دندنات
وكان عليهو سلام تقول ما زول حياة
...ياقدال ـ...
فاكر الجماعة الكانو ساكنك دوام
من منفى لي منفى
فاكر العصافير المسافرات دون جواز
....فاكر القطر
فاكر النخيل ... فاكر الحراز
الليلة كانو جميع هناك
قسما يمين.... كان الجميع باكين عليك
كان المطار فارش عليك
كان الجميع مشتاق اليك
يــــــا ســـــــــلام عـــــليك
لمن تكون زولا عزيز
عن ناس عزاز
يعني كان لازم تفوت
والحزن مشرور في البيوت
والدنيا ما زال فيها حوت
وفيها لسع عنكبوت
يعني كان لازم تفوت
وتخلي اوتارك سكوت
ولسة عندنا ريد جديد
ولسة عندنا ليك قصيد
يعني كان لازم تفوت
وتخلي هذا الحب يموت
يا سلام عليك
لمن تكون زولا عزيز
عن ناس عزاز
يـــــــا ســــــــــلام عــــليك. يا قدال