كل عام وانت منعم في جنات الفردوس اللهم نسألك في هذة الايام المباركة أن تنزل رحمتك وتتقبل دعواتنا لي محجوبي.. ٢٩ أبريل ١٩٩٩ الساعة التاسعة مساء في مستشفى خولة مسقط سلطنة عمان طل علينا أجمل مولود واول فرحتنا محجوب.. قضى طفولة جميلة محاط بي رعايتنا وحبنا ودلالنا ليهو وكبر واتعلم الكلام والكل يردد وراهو سميناه على جدو وكان فرحان بي الاسم .. ليهو النصيب الاكبر من الحب والاهتمام وكبر وصار شاب ورد الحب والاهتمام للناس الحولو أضعاف.. مصدرالفرح والضحك وبين أصحابو سيد القفشات.. يوزع الفرح والابتسامة وين مايمشي لي البعرفو والمابعرفو سلامو للناس الكبار بي الاحضان.. قلبو زي الأطفال.. لاطيش لاتهور.. لايكذب لاينافق.. أصحابو بشبهوهو من الأساس لحدي الجامعة محتفظ بي كل أصحابو يحبهم ويحبو.. حقيقة هو عايش بينا بي روحو الحلوة الروح الطاهرة القلعت الكابوس.. اليوم ٢٢ سنة نسأل الله أن يعوض شبابك الجنة وروحكم انت واخوانك الشهداء تكون مهر لي سودان جديد بإذن الله وان طال الزمن تتحقق العدالة والمجرمين ياخدو جزاهم.. دمكم غالي..
وداد عثمان.. والدة الشهيد